Vísir greindi frá því 3.júlí síðastliðinn að Matvælastofnun(MAST) leggur til að dvöl innfluttra hunda í einangrun verði stytt úr fjórum vikum í tvær vikur við komuna til landsins. Þetta kemur fram í drögum MAST að skýrslu um endurmat á skilyrðum fyrir innflutningi hunda. Drögunum var skilað til atvinnuvega- og nýsköpunarráðuneytisins þann 1. júní og hægt að lesa hér.
Þar er líka lagt til að leiðsögu- og hjálparhundar fyrir fatlaða skuli sæta sömu innflutningsskilyrðum og aðrir hundar að því undanskildu að tveggja vikna einangrun geti farið fram í heimasóttkví undir ströngu eftirliti MAST.
Í gær tók Vísir svo viðtal við Herdísi Hallmarsdóttur formann Hundaræktarfélags Íslands (HRFÍ) þar sem Herdís lýsir yfir ánægju sinni við þessa breytingu.„Þetta er gjörbylting. Undanfarin ár hefur verið nokkurra mánaða biðlisti eftir að koma hundi inn til landsins. Helmingun vistunartíma mun væntanlega stytta þann biðlista,“ segir Herdís.
Ekki myndi þetta aðeins stytta biðtíma og lækka kostnað fyrir eigendur heldur er þetta líka mikilvægt fyrir velferð dýrana sem þurfa að vera í einangrun.„Það sem langmestu máli skiptir er dýravelferðarsjónarmiðið. Að vista ekki dýrið lengur en nauðsyn krefur; eitt, án eigenda sinna og annarra heimilismeðlima. Þetta er grundvallarbreyting og fjórar vikur eru miklu lengri tími en tvær vikur í því samhengi.“
