Þýski fjárhundurinn Hanz var kynntur í gær á vorfundi tæknimanna sveitarfélaga í gær, á Hótel Selfossi. Hanz hefur verið í þjálfun hérlendis í um ár, í samstarfi við Mannvit, að leita að myglu í húsum. Mygluleitarhundar þekkjast víða í Evrópu en ekki hefur verið notast við þá hérlendis hingað til. Einar Ragnarsson, sviðsstjóri hjá Mannviti segir að Hanz muni gjörbylta aðferðum við að leita af leyndri myglu í húsum.
„Ég er búin að vera í samstarfi við Mannvit verkfræðistofu í að verða tvö ár og Hans er búin að vera í þjálfun í rúmt ár að verða. Hann er mjög sannur, ef hann gerir mistök þá er það mér að kenna en hann klikkar eiginlega aldrei,“ segir Jóhanna.
Hanz og þjálfarinn hans, Jóhanna Þorbjörg Magnúsdóttir, fóru á skrifstofu Mannvits á Selfossi í gær eftir fundinn þar sem settar voru út hlutir með myglu á og Hanz boðið að finna hlutina. Þegar Hanz finnur lyktina af myglunni stendur hann alveg kyrr, Jóhanna gefur honum þá merki um að leit sé lokið og fær leik með bolta eða öðrum leikföngum sem verðlaun.
Hundar hafa um 220 milljón lyktarnema í nefinu á meðan manneskjur hafa aðeins um 20 milljónir. Hundar hafa verið þjálfaðir í að leita af peningum, krabbameini, líkum og öðrum dýrum. Einnig hafa þeir verið þjálfaðir í að greina sykurfall og flogakast áður en sjúklingur finnur fyrir einkennum. Frekari upplýsingar um lyktarskyn hunda má lesa hér.