Er hundurinn þinn rétt skráður hjá Dýraauðkenni?

Á Íslandi eru langflestir hundar örmerktir, enda er það skilyrði samkvæmt reglugerð um velferð gæludýra. Örmerki er lítil flaga sem er sett undir húð á hálsi eða á milli herðablaða hundsins. Flestir hundar eru örmerktir sem ungir hvolpar en það er aldrei of seint að örmerkja.

Örmerkið fylgir hundinum alla ævi en 15 stafa númer er skráð í sameiginlegan gagnagrunn hjá Dýraauðkenni, þar sem hægt er að fletta upp öllum númerum. Örmerki er einungis hægt að lesa með örmerkjaskanna og því er gott að skrá númerið í heilsufarsbók hundsins.

Gott að vita:

#1: Ef hundurinn týnist

Ef hundurinn týnist getur sá sem finnur hann, farið með hann á næsta dýraspítala til að lesa örmerkið og útfrá því er hægt að fletta upp eigandanum og koma hundinum heim.

#2: Hundur fær nýjan eiganda

Ef hundur fær nýtt heimili þarf fyrri eigandi hundsins að breyta skráningunni hjá Dýraauðkenni. Þetta er mikilvægt að gera svo upplýsingar séu réttar.

#3: Er örmerkið rétt skráð?

Því miður hefur það ansi oft komið upp að örmerki sé annað hvort ekki skráð í gagnagrunn Dýraauðkennis, eða að tölurnar eru ekki rétt settar inn. Við mælum því eindregið með því að allir kíki inn á www.dyraaudkenni.is og fari yfir upplýsingar dýranna sinna. Þá er líka hægt að setja inn mynd af dýrinu og breyta upplýsingum ef þess þarf. Ef örmerkið sjálft er rangt þarf að senda töluvpóst á dyraaudkenni@dyr.is

Svona athuga þú hvort örmerki hundsins þíns (eða annarra dýra sem þú átt) sé rétt

  1. Farðu inn á www.dyraaudkenni.is

 

2. Neðarlega á forsíðunni finnur þú link til að skrá þig inn. Þegar þú opnar þennan link færðu val um innskráningu með Íslykli eða með rafrænum skilríkjum.

3. Nú sérðu lista yfir þau gæludýr sem skráð eru á þitt nafn. Ef dýrið þitt kemur ekki upp skaltu byrja á að finna örmerki dýrsins og fletta því upp. Ef rangur eigandi er skráður fyrir dýrinu þarftu að hafa samband við þá manneskju og láta hana breyta örmerkinu yfir á þitt nafn.

 

4. Ef dýrið þitt er ekki skráð hjá Dýraauðkenni og þú veist ekki örmerkið, þá geturðu farið á næsta dýraspítala og látið lesa örmerkið, þér að kostnaðarlausu.

Athugasemdir

Berglind Guðbrandsdóttir

Berglind á íslenska fjárhundinn Hektor og whippetana Blossa og Takt. Hún hefur mikla reynslu af hundum og er lærður hundaþjálfari og -atferlisfræðingur. Hún lærði í bandaríska skólanum The Academy for Dog Trainers. Berglind er að læra dýrahjúkrunarfræði og vinnur hjá Dýralæknamiðstöðinni í Grafarholti, ásamt því að reka hundaskólann Hundasetrið. Berglind lærði hundanudd í Chicago School of Canine Massage. Hún er með BSc í sálfræði og hefur unnið með Dýrahjálp Íslands.

Berglind Guðbrandsdóttir